Son zamanlarda insanlar əti tərkibi və mineralları baxımından əvəz edə biləcək qidalar axtarırlar. Ancaq təəssüf ki, elə bir qida yoxdur.

Bu sözləri Axar.az-a açıqlamasında qida eksperti Ağa Salamov əti əvəz edə biləcək qidalardan danışarkən bildirib.

Ekspertin sözlərinə görə, ətin tərkibində olan B12 vitaminini başqa qida ilə əvəz etmək doğru deyil:

“Bəli, B12 göbələkdə də var. Ancaq neçə kq göbələk yemək lazımdır ki, ətin 100 qramında olan B12-ni ala bilək? Bu mümkün deyil. Ya da ki, B12-ni əlavə şəkildə qəbul etmək olar. Bu da düzgün deyil. İnsan ümumiyyətlə, ət yeməlidir. Çünki insanlar Omnivor - həm bitki, həm də heyvan mənşəli qidalarla qidalanan canlılar qrupuna aiddir. Həmçinin orqanizmdə əzələləri oksigenlə təmin edən miqlobin zülalını ətdən başqa heç yerdən almaq olmur.

Ət istifadə etməsək, yalnız ətdə olan B12 və miqlobini qəbul etməsək, nə olacaq? Təbii ki, anemiya və digər xəstəliklər yaranacaq. Ümumiyyətlə, insan əti menyusundan çıxarmamalıdır. Ona görə də əti hər hansı qida ilə əvəz etməyin əleyhinəyəm”.

A.Salamov əlavə olaraq qeyd edib ki, dabaq xəstəliyi yayıldığı üçün insanlar ət almağa tərəddüd edirlər:

“Ancaq burada heç bir təhlükə yoxdur. Həmçinin dabaq xəstəliyi əti çiy yeyəndə keçir. Azərbaycanda isə çiy ət demək olar ki, yeyilmir, yəni süfrə mədəniyyətimizdə yoxdur. Hazırda təcrübəsiz mütəxəssislər danışır və vətəndaşlarda da qorxu yaradırlar. Ət 75 dərəcədə qaynadılırsa, dabaq xəstəliyi olan heyvanı da yeyə bilərsiniz. Halbuki bizdə ət daha yüksək temperaturda bişirilir. Yəni heç bir təhlükəsi yoxdur”.