Keçən il açıqlama var idi ki, hər gün Bakıya 300 min avtomobil daxil olur. Onların 100 mini Xırdalan və Sumqayıtdan gəlir, 200 mini isə ətraf qəsəbələrdən.

Bu sözləri urbanist, şəhərsalma və nəqliyyat üzrə ekspert Anar Əliyev Axar.az-a açıqlamasında Bakıda avtomobil yollarının yüklənməsi barədə danışarkən deyib.

Onun sözlərinə görə, nəqliyyat problemini həll etmək üçün ilk növbədə ictimai nəqliyyatın həm əlçatanlığını, həm də daşıma qabiliyyətini artırmaq lazımdır.

O xatırladb ki, bu gün Bakıda yalnız iki növ şəhərdaxili ictimai nəqliyyat var: avtobuslar və metro.

Ekspert baş plana və dövlət proqramına uyğun olaraq, 2030-cu ilə qədər Bakıda tramvay xətlərinin bərpa olunacağını vurğulayıb:

“İlk xətt məhz Mehdiabaddan “28 May” ərazisinə nəzərdə tutulan tramvay xəttidir. Həmin tramvay xətti əlavə olaraq 100 minə yaxın sərnişin daşıya biləcək. Layihələndirmə bitəndən, açıqlamalar veriləndən sonra daha dəqiq rəqəmlər əlimizdə olacaq”.