Azərbaycan Təhsil, Mədəniyyət və Yardımlaşma Dərnəyinin (AzeDer) fəaliyyətə başlamasının bir illiyi münasibətilə İstanbulda mərasim keçirilib.

Qurumdan Axar.az-a daxil olan məlumata görə, tədbirdə Azərbaycan və Türkiyənin dövlət rəsmiləri, Türkiyə Böyük Millət Məclisinin (TBMM) deputatları, iş adamları, elm, təhsil və mədəniyyət sahələrinin təmsilçiləri, qardaş ölkədə təhsil alan tələbələrimiz, ölkə ictimaiyyətinin nümayəndələri iştirak edib.

Tədbir Türkiyədə avtomobil qəzasında həyatlarını itirən üç azərbaycanlı tələbəni yad etmək məqsədi ilə bir dəqiqəlik sükutla başlayıb.

AzeDer-in sədri Rəşad Abdullayev hesabat məruzəsində rəhbərlik etdiyi təşkilatın məqsədinin azərbaycanlı gənclərin şəxsi karyera qazanmasına dəstək vermək, onların bilik, təcrübə və fikirlərini xarici ölkə gəncləri ilə paylaşmaq, gənclərimizin sosial həyatını inkişaf etdirən layihələr həyata keçirmək kimi mühüm istiqamətlər olduğunu bildirib.

Sədr bundan sonra İNDEX – Azərbaycanın İnsan Kapitalı İnkişafı Mərkəzi olaraq fəaliyyət göstərəcəklərini bildirib. Bu məqsədlə Azərbaycanın insan kapitalı inkişafına öz kiçik töhfələrini verməyə çalışacaqlarını da vurğulayıb.

Təşkilatın fəaliyyətini əks etdirən film nümayişindən sonra qonaqlara məlumat verilib ki, İnsan Kapitalının İnkişafının əsası milli lider Heydər Əliyevin gənclər və təhsil islahatlarından başlayıb. Bildirilib ki, 1969 -1970-ci dərs ilində respublikamızdan kənarda cəmi 47 nəfər təhsil aldığı halda, ulu öndər Heydər Əliyevin həyata keçirdiyi məqsədyönlü siyasət nəticəsində 1975-ci ildə bu rəqəm 14 dəfə artaraq 700 nəfərə yaxın olub. Respublikamızdan kənarda ölkəmizi təmsil edən tələbələr arasında azərbaycanlıların sayı da sürətlə çoxalaraq 1980-ci illərin əvvəlində 97,6 faizə çatdığının vurğulandığı videoçarxda Azərbaycan Respublikasının Prezidenti İlham Əliyevin "qara qızılın insan kapitalına çevrilməsi" ideyasının da reallığa çevrildiyi qeyd edilib.

AzeDer-in bir illik fəaliyyəti və məqsədlərini yüksək qiymətləndirən Azərbaycan Respublikası Prezidenti Administrasiyasının İctimai-siyasi məsələlər şöbəsinin sektor müdiri Vüsal Quliyev dövlət müstəqilliyimizin bərpasından sonra milli lider Heydər Əliyevin həyata keçirdiyi gənclər və təhsil siyasətinin ayrı-ayrı istiqamətləri və onun yüksək nəticələrindən bəhs edib, Prezident İlham Əliyevin ölkəmizə rəhbərlik etdiyi dövrdə bu istiqamətdə həyata keçirdiyi dövlət proqramları və onların bəhrələri barədə ətraflı məlumat verib.

TBMM-nin deputatı Mustafa Kabakcı, Yeni Azərbaycan Partiyası Gənclər Birliyinin sədri Seymur Orucov, Azərbaycan Respublikası Təhsil Nazirliyinin sektor müdiri İlham Nağıyev, ölkəmizin Ankaradakı səfirliyinin müşaviri Nəcibə Nəsibova və Bakı Ali Neft Məktəbinin rektoru Elmar Qasımov çıxışlarında AzeDer-in bir illik fəaliyyətini yüksək dəyərləndiriblər.

Tədbirin sonunda AzeDer-in təşkilatçılığı ilə Avropa ölkələrində yerləşən aparıcı şirkətlər və beynəlxalq qurumlarda təcrübə keçən tələbələrə sertifikatlar təqdim olunub. BP, STATOIL, PWC, Avropa Parlamenti, UNIDO (Sənaye İnkişafı üzrə Birləşmiş Millətlərin Təşkilatı) kimi dünyanın öndə gələn şirkət və qurumlarında staj keçən azərbaycanlı gənclərə sertifikatlar Bakı Ali Neft Məktəbinin rektoru Elmar Qasımov, Yeni Azərbaycan Partiyası Gənclər Birliyinin sədri Seymur Orucov və ASAN XİDMƏT Agentliyin Beynəlxalq və ictimiayyətlə əlaqələr şöbəsinin müdiri Azad Cəfərov tərəfindən təqdim edilib.