Bu gecə Gəncə şəhərində Heydər Əliyev prospekti ilə Şah İsmayıl Xətai prospektinin kəsişməsində yol qəzası qeydə alınıb.

Kəpəztv.az xəbər verir ki, Gəncə sakini Amin Məmmədov idarə etdiyi VAZ 2109 markalı avtomobillə Şah İsmayıl Xətai prospekti ilə hərəkətdə olarkən qarşı tərəfdən gələn Zaur Əliyevə məxsus "Mersedes"lə toqquşub.

Nəticədə hər iki avtomobilə xeyli ziyan dəyib. Bundan başqa "Mersedes" markalı avtomobil yolun hərəkət hissəsindən çıxaraq piyada 47 yaşlı Namiq Hüseynovu vurub. Yaralı dərhal xəstəxanaya çatdırılıb. Həkimlər onun səhhətini orta-ağır kimi qiymətləndirib. Qeyd edək ki, Zaur Əliyev Gəncə şəhər Baş Polis İdarəsinin əməkdaşıdır.

Şəhər xəstəxanasından həkim Rəfail Əsədov bildirib ki, avtomobil vurulması nəticəsində 1967-ci il təvəllüdlü Gəncə şəhər sakini Hüseynov Namiq Nadir oğlu xəstəxanaya gətirilib: "İlkin müayinə zamanı bədənin müxtəlif nahiyyələrində əzik və sıyrıqlar aşkarlanıb. Xəstəyə tibbi yaradım göstərilib və stasionar müalicə üçün palataya yerləşdirilib".