Tələbə Qəbulu üzrə Döblət Komissiyası yenilənmiş test banklarının yeni nəşrini istifadəyə verib.

TQDK-dan Axar.az-a verilən məlumata görə, Azərbaycan bölməsi üzrə riyaziyyat, fizika, biologiya, kimya fənlərindən, rus bölməsi üzrə isə riyaziyyat, fizika və kimya fənlərindən test bankı yenilənib.

Yenilənmiş testlərə 2014-cü ildə keçirilmiş imtahanlarda istifadə olunmuş testlər də əlavə edilib. Həmçinin dərslik, tədris və qəbul proqramlarındakı dəyişiklik və yeniliklər nəzərə alınmaqla ekspertizadan keçirilib, həm məzmun, həm də formaca test tapşırılqları təkmilləşdirilib.

Test banklarına həmçinin 1994-2014-cü illərdə ali və orta ixtisas təhsili müəssisələrinə, hərbi məktəblərə, hərbi liseylərə qəbul və sınaq imtahanlarında istifadə olunmuş test tapşırıqları, "Abituriyent" jurnalının ayrı-ayrı nömrələrində dərc edilmiş model testlər daxildir.

Yenilənmiş test tapşırıqlarının 20-25 faizi heç bir imtahanda istifadə olunmamış testlərdir. Hər bir toplu test bankında olan test tapşırıqlarının bütün modellərini əhatə edir. Bu tapşırıqlar aktiv bankın bir hissəsidir və onların gələcəkdə imtahanlara düşməsi istisna olunmur.

Xatırladaq ki, vəsaitləri TQDK-nın binası qarşısındakı "Abituriyent" köşkündən almaq və ya www.abiturient.az saytından sifariş etmək olar.