Son aylarda ölkəyə Rusiyadan gətirilən avtomobillərin sayında artım müşahidə olunur.

Axar.az-ın əldə etdiyi məlumata görə, ölkə vətəndaşları Rusiyadan ucuz qiymətə avtomobil alaraq ölkəyə gətirir və proses durmadan yayılır.

Məlumatlı mənbənin sözlərinə görə, şimal qonşumuzda rublun dəyərdən düşməsi azərbaycanlılar üçün bu ölkədə avtomobil alışını əlçatan edib:

"Rusiyaya qarşı sanksiyalar rublun kəskin dərəcədə düşməsi ilə nəticələnib. Hazırda bu ölkədə avtomobillərin qiyməti çox enib. Ona görə də azərbaycanlı müştərilər və avtomobil satışı ilə məşğul olanlar bu işdə maraqlıdır".

Gürcüstan bazarından avtomobil idxalında yaranan durğunluğu qiymət bahalığı ilə izah edən mənbə bir müddətdən sonra rus avtomobillərinin Azərbaycan bazarında liderliyi ələ alacağını deyib:

"Məsələn, 2008-ci ilin alman avtomobili ilə eyni ildə istehsal olunan Rusiya avtomobilinin qiymətində yerlə göy qədər fərq var. Almaniya istehsalı olan avtomobil 12 min dollara satılırsa, Rusiya avtomobili bundan 4 qat ucuz başa gəlir. Ona görə də Rusiya avtomobillərinin satışının ölkədə getdikcə artması daha realdır".