2019-cu ilin yanvarından mayına qədər Türkiyədə daşınmaz əmlak alan Azərbaycan vətəndaşlarının sayı 466 nəfər təşkil edib.

Axar.az xəbər verir ki, bu məlumatı Türkiyə Milli Statistika Komitəsi yayıb. Məlumata görə, bu, keçən ilin analoji dövrü ilə müqayisədə 134 ədəd çox olub. Təkcə may ayında həmvətənlərimiz Türkiyədə 90 daşınmaz əmlak alıb ki, bu da 2018-ci ilin mayındakı göstəricidən 15 ədəd çoxdur.

Qeyd edək ki, 2019-cu ilin mayında ümumilikdə Türkiyədə 82,2 min daşınmaz əmlak satılıb. Bunun 3900-ü xarici ölkə vətəndaşlarına satılıb. Bu ölkədə ən çox daşınmaz əmlakı İraq, İran və Rusiya vətəndaşları alıblar.