Millət vəkili Qənirə Paşayeva “Əngəlsiz Düşüncə” Sosial İnkişafa Yardım İctimai Birliyi və Fiziki məhdudiyyətlilər üçün Yapon Sənətləri və İdmanları Klubunun təşkil etdiyi “Aykido Əngəl Tanımır” layihəsinin ilkin mərhələsinin bağlanış mərasimində iştirak edib.

Axar.az xəbər verir ki, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun 1 saylı Sağlamlıq imkanları məhdud gənclərin Peşə Reabilitasiya Mərkəzində təşkil edilən tədbirdə çıxış edən millət vəkili fiziki imkanları məhdud insanların öyrənməyə həvəsli və istedadlı olduqlarını, qısa zamanda nə qədər çox şeylər öyrənə bildiklərini söyləyib.

Prezident İlham Əliyevin uğurlu sosial siyasətinin bir istiqaməti kimi əlilliyi olan insanların cəmiyyətə inteqrasiyası istiqamətində aparılan işlər barədə danışan Q.Paşayeva fiziki imkanları məhdud şəxslərə yüksək səviyyədə dövlət qayğısının göstərildiyini deyib. Birinci vitse-prezident Mehriban Əliyevanın hər zaman fiziki imkanları məhdud şəxslərə qayğı ilə yanaşdığını deyən millət vəkili onların cəmiyyətin müxtəlif sahələrində fəallığının artırılması məqsədilə çoxsaylı layihələrin həyata keçirilməsinin təqdirəlayiq olduğunu deyib.

Millət vəkili dövlət səviyyəsində göstərilən diqqət və qayğı sayəsində əlilliyi olan şəxslərin fəal şəkildə idmanla məşğul olduqlarını, beynəlxalq yarışlarda yüksək nəticələr əldə edə bildiklərini deyib.

Q.Paşayeva Boccia idman növü ilə yanaşı, Aykido döyüş növü ilə məşğul olan fiziki imkanları məhdud insanlarımızdan ibarət bir komandanın yaradılacağına və ölkəmizi beynəlxalq yarışlarda layiqincə təmsil edəcəklərinə inandığını deyib, onlara gələcək yarışlarda da daha böyük uğurlar arzulayıb.

Millət vəkili fiziki imkanları məhdud gənclərimizə Aykidonun sirlərini öyrədən Türkiyə Fiziki məhdudiyyətlilər üçün Yapon Sənətləri və İdmanları Klubunun rəhbəri Engin Enginə və köməkçisi Ərcan Aydəmirə təşəkkürünü bildirib və növbəti səfərlərində də hər zaman lazımi dəstək göstərməyə hazır olduğunu deyib.

Sonda təlim iştirakçıları Aykido yapon idman növündən fəndlər nümayiş etdiriblər. Təlim iştirakçılarına Türkiyənin Fiziki məhdudiyyətlilər üçün Yapon Sənətləri və İdmanları Klubu dərnəyi və “Əngəlsiz düşüncə” Sosial İnkişafa Yardım İB tərəfindən sertifikatlar təqdim edilib.

Millət vəkili təlim iştirakçılarının hər birinə hədiyyələr təqdim edib.