Azərbaycana gələcək turistlərin daha rahat viza əldə edə bilməsi üçün 4 dövlət qurumu birgə iclas keçirib.

Mədəniyyət və Turizm Nazirliyindən Axar.az-a verilən məlumata görə, Mədəniyyət və turizm nazirinin müavini Nazim Səmədovun, Dövlət Miqrasiya Xidməti rəisinin müavini Pərviz Musayevin, Xarici İşlər Nazirliyinin nümayəndəsi Elmar Qədimovun və Azərbaycan Turizm Assosiasiyası İdarə Heyətinin sədri Nahid Bağırovun iştirakı ilə elektron turist vizası sistemində akkreditasiyadan keçirilmiş 55 daxili turizmlə məşğul olan turizm şirkətinin nümayəndələri ilə görüş keçirilib. Görüşdə çıxış edən Mədəniyyət və turizm nazirinin müavini N. Səmədov turizm şirkətlərinin bu sistemə marağının getdikcə artdığını və artıq 55 şirkətin elektron turist vizası sisteminə qoşulduğunu vurğulayıb.

Bu viza sistemi tətbiq olunduqdan sonra Azərbaycana gəlmək üçün turistlər daha rahat şəkildə viza əldə edə bilirlər. Həmçinin, elektron turist vizasının daha da təkmilləşdirilməsi, istifadə qaydaları, gələcəkdə daha çox turizm şirkətlərinin bu sistemə qoşulması ilə bağlı müzakirələr aparılıb.

Qeyd edək ki, elektron turist vizası sistemi ölkəmizdə 2013-cü ilin aprel ayından tətbiq olunur.