Paytaxtın Badamdar şosesində aparılan təmir işləri təxminən 3 aydır ki, davam edir.

Sakinlərin Axar.az-a verdiyi məlumata görə, təmir işləri başlananda yolun 6 günə istifadəyə veriləcəyi deyilsə də, işlər hələ də yekunlaşmayıb.

Sakinlərin narazılığına səbəb təmirin hərəkəti iflic etməsidir. Bundan başqa, yenidənqurma işləri qış aylarına təsadüf etdiyindən, yağış və qurunt suları da yolları keçilməz edib.

Yolun təmiri ilə məşğul olan işçilərin əməkdaşımıza verdiyi məlumata görə, yubanmaya səbəb soyuq hava şəraitidir. Yolun nə zaman təhvil veriləcəyi isə havalardan asılıdır.

Xatırladaq ki, dekabrın 1-də Nəqliyyat Nazirliyi Nəqliyyatı İntellektual İdarəetmə Mərkəzi Badamdar şosesinin Badamdar dairəsindən İzzət Nəbiyev küçəsi ilə kəsişməsinə qədər olan hissəsində təmir işlərinə start verildiyini açıqlayıb. Rəsmi məlumata əsasən, təmirin 6 iş günü ərzində təhvil verilməsi nəzərdə tutulurdu.