Təbii ehtiyatlar, energetika və ekologiya komitəsi sosial məsuliyyət strategiyasına uyğun olaraq, bu gün bütün heyətlə onlayn toplantı keçirdik. Ölkəmizdə və bütün dünyada tüğyan edən bəlaya qarşı mübarizə çərçivəsində Cənab Prezidentimiz İlham Əliyev tərəfindən 19 mart 2020-ci il tarixli sərəncamı ilə yaradılmış Koronavirusla Mübarizəyə Dəstək Fonduna (KMDF) əmək haqqı vəsaitimizlə qoşulmağı qərara aldıq.

Axar.az xəbər verir ki, bunu Milli Məclisin Təbii ehtiyatlar,energetika və ekologiya komitəsinin üzvü Naqif Həmzəyev bildirib.

“Bugünlərdə bu xəstəlikdən əziyyət çəkən bütün insanlara yardımçı olmaq bizim vətəndaşlıq və vicdan borcumuzdur” - deyə, millət vəkili əlavə edib.

Qeyd edək ki, ötən gün Milli Məclisin Mədəniyyət komitəsinin üzvləri belə qərar qəbul ediblər.