Koronavirusla əlaqədar təhsil müəssisələrində tədris və təlim-tərbiyə prosesinin mayın 4-dək uzadılmasından sonra bəzi valideynlər sosial şəbəkələrdə övladlarını hələ bir müddət də məktəbə buraxmayacaqlarını bildiriblər. Onlar övladlarının virusa yoluxmaq təhlükəsindən ehtiyat etdikləri deyiblər.

Məsələ ilə bağlı Axar.az-a açıqlama verən psixoloq Gülnar Orucova bildirib ki, koronavirus bitsə belə, bu qorxular müəyyən valideynlərdə özünü göstərəcək.

“Panikaya düşən, nevrozdan əziyyət çəkən şəxslər bəzi şayiələrə inanırlar. Belə valideynlər hətta karantin bitdikdən sonra övladlarını məktəbə getməyə qoymayacaqlar. Bunu sağlamlıq barədə saxta arayışlar və s. hesabına etməyə çalışacaqlar. Bəziləri hətta bu virusla bağlı uşaqlarda qorxu yaradırlar. Belə olan halda uşaqlar özləri də məktəbə getməkdə maraqlı olmurlar. Bunun olmaması üçün onlarda pandemiyanın bitməsi və ya azalması barədə güvən duyğusu yaratmalıyıq. Valideynlər övladlarına virusdan necə qorunmanın yolunu başa salmalıdır. Həmçinin bu istiqamətdə sosial çarxlar çəkilməli, psixoloqlar, həkimlər, KİV maarifləndirmə işlərini davam etdirməlidir. Uşaqlar virusa yoluxmaqdan qorxsalar, təlim-tədris prosesindən geri qalacaqlar. Bu səbəbdən saxta arayışların verilməməsi üçün aidiyyəti sahəyə ciddi nəzarət edilməlidir”, - G.Orucova qeyd edib.