Göyçay rayonunda 4 avtomobilin iştirakı ilə zəncirvari yol qəzası baş verib.

Axar.az-ın bölgə müxbiri xəbər verir ki, hadisə saat 23:00 radələrində Göyçay-Ucar yolunun 8-ci kilometrliyində, Xəlitli kəndi ərazisində qeydə alınıb.

Göyçay sakinləri - 25 yaşlı Şahin Məmmədovun idarə etdiyi VAZ-2106, 24 yaşlı Aqşin İsmayılovun idarə etdiyi “Volksvagen Passat", Nurlan Vəliyevin idarə etdiyi VAZ-21014, 42 yaşlı Seymur Şirinovun idarə etdiyi “Mersedes Sprinter” markalı yük avtomobilləri toqquşub.

Hadisə zamanı Göyçay şəhər sakini, 42 yaşlı Ariz İsmayılov, Nurlan Vəliyev və başqa 2 nəfər müxtəlif xəsarətlərlə Göyçay Rayon Mərkəzi Xəstəxanasına aparılıb.

Hadisə yenicə baş verdiyi üçün digər 2 yaralının adı hələlik məlum deyil.

Faktla bağlı Göyçay Rayon Polis Şöbəsi tərəfindən araşdırma aparılır.