Hazırda dəniz suyunun Kürə qarışması demək olar ki, dayanıb, vəziyyət stabilləşib. Problemin həlli üçün operativ fəaliyyətə keçən əlaqədar təşkilatların işi təqdir olunmalıdır.

Axar.az xəbər verir ki, bunu Neftçala rayonundan millət vəkili seçilən Sabir Rüstəmxanlı Xəzər dənizinin suyunun Kürə qarışması nəticəsində rayonun içməli su qıtlığı ilə üz-üzə qalması ilə bağlı Musavat.com-a açıqlamasında deyib.

Millət vəkili duruma operativ müdaxilə edildiyini bildirib:

“Neftçala Rayon İcra Hakimiyyətində qərargah yaradıldı və "Azərsu” Açıq Səhmdar Cəmiyyəti ilə birlikdə problemin aradan qaldırılması istiqamətində müvafiq tədbirlər həyata keçirilməyə başlandı. Rayon sakinləri də həmin vaxt razılıqla bildirirdi ki, insanların içməli su ilə təmin olunması üçün işlər görüldü”.

Qeyd edək ki, Neftçala rayonunda içməli su problemi yaranmışdı. Belə ki, çayda suyun səviyyəsinin hədsiz dərəcədə aşağı düşməsi nəticəsində Xəzər dənizinin suyu Kürə axırdı. Ekoloji hadisə Neftçala rayonunda Kürün Xəzərə töküldüyü yerdə, yəni çayın mənsəbində baş vermişdi.

Dəniz suyunun 30 kilometr məsafədə Kür çayına qarışması nəticəsində rayonun Sübh, Qırmızı Şəfəq, Yenikənd, 1 nömrəli, 2 nömrəli Mayak, Bankə qəsəbəsi, Kürkənd, Uzunbabalı, Şirvanlı, Tatarməhlə kəndləri və rayon mərkəzi içməli su qıtlığı ilə üzləşmişdi.