"Bununla da inzibatı tənzimlənmə kompleks tədbirlər hesabına istehlakçıların daha ucuz dərmanlar almasına imkan verəcək".

Axar.az xəbər verir ki, bu haqda iqtisadçı ekspert Vüqar Bayramov açıqlama verib. O bildirib ki, inzibati tənzimlənmə nəticəsində süni bahalaşmanın qarşısı alınacaq:

"Nazirlər Kabinetinin qərarına əsasən, dərman vasitələrinin ekspertiza xidmətləri, dövlət qeydiyyatına alınmış dərman vasitələri də qiymətləri dövlət tərəfindən tənzimlənən malların siyahısına daxil edilib. Tarif Şurasının dərman preparatlarının qiymətini tənizmlənməsinə başlaması sözügedən bazarda müşahidə edilən yüksək və daha çox süni xarakter daşıyan qiymətlərlə bağlıdır. İqtisad və Sosial İnkişaf Mərkəzinin apardığı monitorinqlər göstərir ki, Azərbaycanda dərmanların qiyməti qonşu ölkələrlə müqayisədə xeyli yüksəkdir. Belə ki, oxşar dərman preparatlarının Bakıdakı qiyməti orta hesabla Türkiyə ilə müqayisədə 2, İran ilə müqayisədə 2.5 dəfə yüksəkdir. Eyni zamanda digər qonşularımız Rusiya və Gürcüstan ilə müqayisədə də yüksək olaraq qalmaqdadır.

Ölkə prezidentinin ötən müşavirədə dərmanların qiymətinin yüksək olduğunu qeyd etməklə tapşırıqlarını verməsi əslində sözügedən bazarda qiymətlərin tənzimlənməsinin vacibliyini bir daha gündəmə gətirmişdi. Praktiki olaraq, dərman bazarındakı süni qiymətlərin inzibati tənzimlənməsinə ehtiyac var idi".

İqtisadçı qiymətlərin Taarif Şurası tərəfindən tənzimlənməsi və bu yöndə ola biləcək dəyişikliklərə də toxunub:

"Əslində, bu, dərman bazarındakı qiymət tavanın müəyyənləşdirilməsidir. Bu, təcrübədən fərqli bazarlar üçün hətta inkişaf etmiş ölkələrdə, o cümlədən sosial deyil, bazar iqtisdiyyatı ilə tənzimlənən ABŞ-da tətbiq edilir. İnzibati təzimlənmənin müsbət tərəfi ondadır ki, bazarda qiymət artımlarının qarşısı alınacaq. Bununla yanaşı qiymət tənizmlənməsində əsas məqsəd eyni zamanda endirimlərə nail olmaqdan ibarət olmalıdır. Bunun üçün qiymətləri tənzimlənən hər bir dərman preparatının maya dəyərinin aydın şəkildə hesablanması və buna uyğun qiymətin müəyyənləşdirilməsinə ehtiyac var.

Tənzimlənən qiymətlər əhalinin alıcılıq qabiliyyətinə uyğun olmaqla yanaşı iş adamlarının gəlirlilik səviyyəsinə də mənfi təsir göstərməməlidir. Qiymət tənizmlənməsi fonduna bazarda qiymətlərin əlçatanlığına nail olunması üçün həm idxalda rəqabətin gücləndirilməsi, həm də yerli istehsalın genişləndirilməsi olduqca vacibdir. Birinci qrup tədbirlər rəqabət nəticəsində idxal olunan məhsulların qiymətinin azalmasına, ikinci qrup tədbirlər isə idxaldan asılılığın aradan qaldırılması və bazara ucuz məhsulların daxil olmasına səbəb olacaq. Bununla da inzibatı tənzimlənmə kompleks tədbirlər hesabına istehlakçıların daha ucuz dərmanlar almasına imkan verəcək".