23:24. 29/12/2013

Dünən Bakı-Şamaxı yolunda 8 nəfərin ölümü ilə nəticələnən dəhşətli yol qəzasına səbəbkar olan yol polisinə görə qızıldaşlılar kütləvi şəkildə tələb irəli sürüblər.

"Axar.az"a Qaradağ rayonunun Qızıldaş qəsəbəsindən daxil olan məlumata görə, sakinlər Qaradağ rayon İcra Hakimiyyətinin Qızıldaş qəsəbə nümayəndəliyinin qarşısına toplaşaraq, günahkarın cəzalandırılmasını tələb edirlər. Sakinlər bildirir ki, qəzanın baş verməsinə səbəb yol patrul xidməti əməkdaşının 1990-cı il təvəllüdlü Qasımov Nurlan Ədalət oğlunun sürücüsü olduğu 90 KU 103 dövlət nömrə nişanlı "VAZ 2107" markalı maşını qovmasıdır. Yol polisinin avtomaşını qovması nəticəsində qəza baş verib və dəhşətli faciə yaşanıb.

Bu barədə artıq sosial şəbəkələrdə də məlumatlar yer alıb. Gənc fəal, Qızıldaş qəsəbə sakini Samir Əsədli öz profilində bu etiraz haqqında yazıb və şəkillər paylaşıb.

Məlumata görə, hazırda Bakı-Şamaxı yolunun 22-ci km-də, Müşfiqabad qəsəbəsi ərazisində yerləşən YPX postunu da 300-dək Qızıldaş sakini bağlayıb, maşınların hərəkətinə imkan vermirlər. Tələbləri isə həmin yol polisi əməkdaşının məsuliyyətə cəlb edilməsidir.

Xatırladaq ki, 28 dekabr 2013-cü il tarixdə Bakı-Şamaxı yolunun 55-ci km-də dəhşətli qəza baş verib, iki avtomobil toqquşub. Nəticədə 90 KU 103 dövlət nömrə nişanlı "VAZ 2107" markalı minik maşının sürücüsü, Qaradağ rayonu Qızıldaş qəsəbə sakini, 1990-cı il təvəllüdlü Qasımov Nurlan Ədalət oğlu və sərnişinləri - Qızıldaş qəsəbə sakinləri Əliyev Güloğlan Balaxan oğlu və Bəndiyev Rəhman Əmrah oğlu dünyasını dəyişib.

Ağsu rayonun Qasımbəyli kənd sakini, 1956-cı il təvəllüdlü Hacıyev İnqilab Tacəddin oğlunun idarə etdiyi 90 BC 517 dövlət nömrə nişanlı "VAZ 2107" markalı avtomobildə olan 4 nəfər – sürücü özü, Ağsu rayonunun Ərəbmehdibəy kənd sakini, 1985-ci il təvəllüdlü Xəlilov Səməndər Kamandar oğlu, 1937-ci il təvəllüdlü Nuriyeva Tutu Əli qızı və Ağsu rayonu Gəgəli kənd sakini, 1991-ci il təvəllüdlü Mədətov Valeh Şirin oğlu da ölüb.

Bu gün isə yaralılardan daha birinin öldüyü və beləliklə, qəzanın 8 nəfərin ölümünə səbəb olduğu açıqlandı.

Əlavə məlumat veriləcək.

(Foto Qızıldaş qəsəbəsindəki etirazdandır)

***

00:48. 30/12.2013

Gənc fəal Samir Əsədlinin verdiyi məlumata görə, hadisə yerinə Abşeron rayon Polis İdarəsinin və Dövlət Yol Polisi İdarəsinin Müşfiqabad YPX postunun rəisi və digər zabitlər gəlib, sakinlərlə danışıq aparıblar. Yüksək rütbəli zabitlər hadisənin ciddi şəkildə araşdırıldığını, baş verənlərlə bağlı sabah Qızıldaş qəsəbəsində onlarla görüşəcəklərini və ətraflı məlumat verəcəklərini bildiriblər.

Bu münasibətdən razı qaldıqlarını bildirən Qızıldaş qəsəbə sakinləri etiraz aksiyasını dayandırıblar. Hazırda maşınların hərəkəti bərpa olunub.