Ana səhifə Toplum |
14:32
Binəqədi Rayon Məhkəməsinin qarşısında Vətən müharibəsi şəhidlərinin xatirəsini əbədiləşdirmək üçün əkilən 2900 ağacdan bəziləri suvarılmadığı üçün quruyub.
Sahədə işləyən inzibati işçilərin Axar.az-a verdikləri məlumata görə, ərazidə 3 su quyusu olsa da, həmin quyular su ilə doldurulmur:
"Sahəyə yeni suvarma sistemi də çəkilib. Lakin quyularda su olmadığı üçün bir nasosdan gələn suyu üç hissəyə bölməklə ağaclar suvarılır. Nəticədə ağacların böyük əksəriyyəti susuzluqdan quruyub. Bu barədə aidiyyəti qurumlara dəfələrlə müraciət edilməsinə baxmayaraq, heç bir nəticəsi olmayıb.
Vətən müharibəsi şəhidlərinin xatirəsini əbədiləşdirmək üçün sahəyə şəhidlərimizin sayı qədər - 2900 ağac əkildi. Növbə ilə quruyan ağacları sulayırıq. Yenidən yaşıllaşır. Lakin su olmadığına görə bir müddət sonra yenidən quruyur. Dəfələrlə müraciət etmişik ki, quyular su ilə təmin edilsin. Bu, şəhidlərin xatirəsinə hörmətsizlikdir”.
Binəqədi Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin baş məsləhətçisi Leyla Quliyeva saytımıza açıqlamasında bildirib ki, adı çəkilən ünvanda baş verən suvarma problemi müvəqqəti texniki nasazlıq idi:
“Hazırda problem aradan qaldırılıb və ağacların suvarılması ilə bağlı problem öz həllini tapıb. Məsələ Rayon İcra Hakimiyyətinin tam nəzarətindədir”.
Tarix
2021.06.24 / 22:05
|
Müəllif
Aytəkin Qardaşova
|