“E-təbib” tətbiqinin blutuz aktiv edilmədən çalışmaması müzakirələrə və şübhələrə yol açıb.

Axar.az xəbər verir ki, “E-təbib” tətbiqini telefona yükləməklə, koronavirusla bağlı ən son məlumatları öyrənməklə yanaşı, şəxsin fərdi məlumatı, peyvənd sertifikatının olub-olmaması, test analizi və s. bütün informasiyalar, şəxsi kabinetdə isə fotosuna qədər görünür. Bu tətbiqin üstünlüklərindən biri də üzərində hər hansı bir sənəd götürmədiyin zaman şəxsi kabinetindəki məlumatla peyvənd sertifikatının informasiyalarını tutuşdurmaq və sertifikatın olduğunu sübut etmək imkanıdır.

Ancaq maraqlıdır ki, “e-təbib” tətbiqi blutuz açıq olmadan aktivləşmir. Üstəlik, peyvənd vurulduğu anda mobil telefonda olan bu tətbiqi aktivləşdirərkən, artıq bütün göstəricilər ekranda görünür. İstifadəçilər isə peyvənd vurulmasının tətbiqdə dərhal görülməsinə şübhə ilə yanaşırlar. İddialar da buradan yaranıb: tətbiq blutuz vasitəsilə peyvənd olunduğunu “görür”, buna görə də tətbiqin çalışması üçün blutuzun açılması şərtdir.

Bu şayiənin yayılmasının digər səbəbi isə “e-təbib”dən başqa heç bir tətbiqdə blutuzun aktivləşməsinin tələb edilməməsidir.

Mütəxəssislərin bildirdiyinə görə isə “e-təbib” tətbiqində blutuz şərti yaxınlıqda korona xəstəsinin olub-olmadığını telefon sahibinə xəbər vermək üçün hazırlanıb. Belə ki, korona xəstəsi evi tərk edərsə və yaxud hər hansı bir şəxsin test nəticəsi pozitiv çıxarsa, onun son bir neçə gündə ünsiyyətdə olduğu şəxslər həm də blutuz vasitəsilə müəyyənləşir və həmin şəxslər xəbərdar edilir. Belə çıxır ki, blutuz şərti olmasaydı, virusa yoluxmuş şəxslərin də gəzmələri, başqalarını yoluxdurmaq imkanları xeyli artardı.

Yəni “e-təbib” tətbiqində blutuz şərti proqramın daha faydalı olmasına hesablanıb.