Valideynlər azyaşlı uşaqları nəzarətsiz qoymamalı, yol hərəkət qaydaları barədə məlumat verməli, məktəblərin qarşısında dayanma-durma qaydalarını pozmamalı, uşaqları piyada keçidlərindən istifadəyə öyrətməlidir.

Axar.az xəbər verir ki, bunu Bakı Şəhər Dövlət Yol Polisi İdarəsinin bölmə rəisi polis polkovniki Vaqif Əsədov valideynlərə və şagirdlərə xəbərdarlığında deyib.

“Şagirdlər də öz növbəsində piyada keçidlərindən istifadə etməli, ictimai nəqliyyatda qaydalara əməl etməlidir. Unutmayın ki, qayda pozuntuları təkcə cərimə ilə nəticələnmir, sağlamlıqla bağlı fəsadlara səbəb olur”, - V.Əsədov bildirib.

O əlavə edib ki, Bakı Şəhər Dövlət Yol Polisi İdarəsi əməkdaşları yeni dərs ilinin ilk günü ilə əlaqədar ümumi istifadədə olan yollara daha yaxın olan məktəblərdə müəllim, şagird və valideyn kollektivi ilə görüş keçirib, maarifləndirici məlumatlar veriblər.