Şəmkir rayonunun Ələsgərli kəndindən İrmaşlı kəndinə gedən 20 kilometrlik yol bərbad vəziyyətdədir.

Bu barədə Axar.az-a Şəmkir rayonunun Ələsgərli kəndinin sakinləri tərəfindən ünvanlanan şikayətdə bildirilib.

“Həmin bölgənin deputatı Nurlan Həsənov maşını zədələnməsin deyə, onu 20 kilometr aralıda saxlayır və kəndə başqa maşınla gəlir. Bu kəndin acınacaqlı durumundan deputat xəbərdardır, lakin insanlara kömək etmir. Kəndin məktəbi kilsəyə bənzəyir. Üzərində xaç işarələri və digər rəmzlər var. İçərisi isə tam yararsızdır. Kənddə qaz da yoxdur”.

Təhsil Nazirliyinin Əsaslı tikinti və təchizat idarəsinin rəis müavini Pərvin Mehrəliyev saytımıza açıqlamasında “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nda Şəmkir rayonunun Ələsgərli kəndində yeni məktəb tikintisinin nəzərdə tutulmadığını bildirib: “Lakin bu kəndin məktəb problemi diqqətdə saxlanılacaq”.

Azəriqaz İB-in İctimaiyyətlə əlaqələr şöbəsinin rəisi Eldəniz Vəliyev isə deyib ki, Ələsgərli kəndinin qazlaşması 2023-cü ilin planına salınıb:

“2023-cü ilin planı hazırdır. Hansı yaşayış massivlərinin və kəndlərin qazlaşacağını noyabr ayında elan edəcəyik”.

Kəndin yol probleminə Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli belə aydınlıq gətirib:

“Ölkə üzrə bu cür kəndlərarası və kəndləri birləşdirən problemli yolların sayı kifayət qədər çoxdur. Bu iş mərhələli şəkildə icra olunur. Lakin müəyyən nüanslar nəzərə alınmaqla həmin yolların daha tez bərpası mümkündür. Ələsgərli kəndinin sakinləri bizim Agentliyimizə müraciət etsələr, qısa zamanda məsələyə baxılacaq”.