Bakıda marşrut avtobuslarında sürücü işləyən gürcüstanlılar ölkədən çıxarılır.

Axar.az-ın əldə etdiyi məlumata görə, son günlər xeyli sayda Gürcüstan vətəndaşı olan avtobus sürücüsü Azərbaycandan getməli olub.

Buna səbəb kimi onların sənədlərinin qaydasında olmadığı göstərilir. Dövlət Miqrasiya Xidməti əməkdaşları marşrut sürücüləri arasında Azərbaycanda 90 gündən artıq qalan Gürcüstan vətəndaşlarının olduğunu müəyyən edib.

Qeyd edək ki, Gürcüstanla Azərbaycan arasında vizasız gediş-gəliş qaydası tətbiq olunduğu üçün həmin ölkənin vətəndaşları Azərbaycan Respublikasında 90 günədək qala bilərlər.

Bir neçə il öncə Milli Məclis "Ölkədən getmək, ölkəyə gəlmək və pasportlar" haqqında Qanun qəbul etdi. Qanuna görə, Azərbaycanla həm viza rejimi olan, həm də vizasız rejimə malik ölkələrdən gələn əcnəbilər ölkəmizdə cəmi 90 gün qala bilər.

90 gündən sonra həmin ölkəyə qayıdıb təkrar viza almalıdır. Qanunun müvafiq maddəsi Gürcüstanda yaşayan azərbaycanlılara şamil edilmirdi. Lakin 2012-ci ildən qanunun bu maddəsi onlara da şamil edilir.