Hesablama Palatası bütün təşkilatların fəaliyyətinin qanunvericiliyə uyğunluğunun auditini həyata keçirir.

Axar.az xəbər verir ki, bu sözləri Hesablama Palatasının sədri Vüqar Gülməmmədov modern.az-a müsahibəsində deyib.

Qurum sədrinin sözlərinə görə, Palatanın fəaliyyətinə qanunazidd müdaxilə etmək yolverilməzdir:

"Palata üzvlərinin, habelə Hesablama Palatası Aparatının vəzifəli şəxslərinin xidməti vəzifələrini yerinə yetirmələri ilə əlaqədar onlara mane olmaq, təzyiq göstərmək Azərbaycan Respublikasının qanunvericiliyi ilə nəzərdə tutulmuş məsuliyyətə səbəb olur. Palata işini sərbəst şəkildə həyata keçirir və elə bir qurum yoxdur ki, işimizə müdaxilə etsin və şəffaflığın təmin olunmasına maneçilik törətsin.

Hesablama Palatası, dediyim kimi, cəmiyyətdə hansı imic daşımasından asılı olmayaraq, bütün təşkilatların fəaliyyətinin qanunvericiliyə uyğunluğunun auditini həyata keçirir. Qeyd etdiyim kimi, dövlət vəsaitlərini istifadə edən və ya dövlət gəlirlərinin formalaşmasında iştirak edən hər bir qurum Palatanın maliyyə nəzarətinin subyektidir və fəaliyyətimizə müdaxilə yoxdur".