Dövlət Şəhərsalma və Arxitektura Komitəsində Bakı rayonlarının sosial-iqtisai inkişafının sürətləndirilməsi ilə bağlı toplantı keçirilib.

Modern.az xəbər verir ki, toplantıda paytaxt rayonlarının icra başçıları da iştirak ediblər. İclasda Bakı şəhəri ərazisində bundan sonra 10 mərtəbədən yüksək binaların tikintisinin qadağan olunması ətrafında müzakirələr aparılıb. Bununla bağlı Nazirlər Kabinetinin müvafiq qərarı barədə danışılıb.

Komitə sədri Abbas Ələsgərov deyib ki, bundan sonra sahibkarlar tikinti layihələrini Dövlət Şəhərsalma və Arxitektura Komitəsi ilə razılaşdırdıqdan sonra həyata keçirəcəklər. Tədbirdə Bakı şəhərinin mərkəzi rayonlarına aid eskiz layihələr də təqdim edilib.

İclasda o da vurğulanıb ki, yaşayış binalarının mövcud həyətlərində sosial infrastruktur obyektlərindən başqa tikintilərin aparılması qadağan edilməli, şəhərin tikilmiş hissəsində mərtəbəlilik 10-dan artıq olmamalıdır.

Müzakirələrdə Səbail, Nəsimi, Nərimanov, Yasamal və Pirallahı rayonlarının icra başçıları çıxış ediblər.