Təsdiq olunmuş köç planına əsasən Xocalı şəhəri, Kərkicahan qəsəbəsi və Malıbəyli kəndində, eləcə də Ağdərə rayonunun Umudlu kəndinə bu il ərzində ümumilikdə 228 ailənin yerləşdirilməsi nəzərdə tutulub. Bəs, bu ərazilərə köçəcək vətəndaşların içməli su ilə təminatı necə olacaq?

Axar.az xəbər verir ki, məsələ ilə bağlı Azərbaycan Dövlət Su Ehtiyatları Agentliyindən Trend-ə ərazilərə köçəcək əhalinin içməli su ilə təminatında heç bir problem olmayacağı bildirilib:

"Xocalı şəhərinin içməli su təminatında heç bir problem yoxdur. Subartezian quyusu qazılıb və əlavə olaraq Badara çayından 2.6 km məsafədə magistral su xətti çəkilib. Kərkicahan qəsəbəsinin də heç bir problemi yoxdur. Şəbəkənin qurulması Bakı Abadlıq Xidməti tərəfindən aparılır. Su mənbəyi və anbarı mövcuddur. Malıbəyli kəndində də içməli su ilə bağlı problem yoxdur.

Ağdərə rayonunun Umudlu kəndində də su mənbəyi var. Magistral su kəmərinin və anbarın tikintisi planlaşdırılır. Əhali köçənə qədər bu işlər tamamlanacaq. Qayıdış Planına əsasən ərazidə su problemi olmayacaq".