Hazırda Mangistau vilayətinin xəstəxanasında 6 xəstə müalicə alır, onlardan 4-ü reanimasiya, 2-si isə travmatologiya şöbəsindədir.

Axar.az xəbər verir ki, bunu Qazaxıstan Səhiyyə Nazirliyi AZAL-a məxsus sərnişin təyyarəsinin qəzaya uğraması nəticəsində xəsarət alanların vəziyyəti ilə bağlı məlumatında bildirib.

“Müşahidələrə əsasən, xəstələrin vəziyyətində pisləşmə qeydə alınmayıb. Bir xəstə vazopressor dəstəyindən çıxarılıb, digər zərərçəkənin tonik dozası isə 3-dən 1-ə endirilib”, - məlumatda deyilir.

Qeyd olunub ki, Azərbaycandan iki xəstənin təxliyəsi məsələsi ilə bağlı həkimlərin konsiliumunun keçirilməsi və onların daşınmaya hazır olub-olmamasının qiymətləndirilməsi planlaşdırılır.

Xatırladaq ki, 25 dekabrda Bakı-Qroznı reysini həyata keçirən AZAL təyyarəsi Qroznı səmasında Rusiya HHM sistemləri tərəfindən vurulub və ciddi zədə alıb. Enişinə icazə verilmədiyindən Aktauya istiqamət götürən təyyarə Aktau hava limanı yaxınlığında qəzaya uğrayıb. Qəza nəticəsində göyərtədə olan 67 nəfərdən 38-i həlak olub, 29 nəfər sağ qalıb.