Bələdiyyələrlə bağlı indiyədək çox danışmışıq, onların səlahiyyətlərinin az olmasından gileylənmişik. Biz bələdiyyələrlə bağlı məruzəni də dinlədik. Məruzədə çatışmayan konkretlikdir. Məsələn, məruzədə qeyd olunur ki, şəhid ailələrinə kömək olunub, kimlərəsə yardımlar göstərilib. Neçə nəfərə yardım göstərilib, neçə şəhid ailəsinə kömək edilib, hansı məbləğdə? Misal üçün, neçə binanın qarşısında abadlıq işləri aparılıb? Neçə kilometr yol təmir olunub? Bu barədə məlumatlar yoxdur.

Axar.az xəbər verir ki, bunu Ədalət, Hüquq, Demokratiya (ƏHD) Partiyasının sədri, Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Qüdrət Həsənquliyev parlamentin bu gün keçirilən plenar iclasında bələdiyyələrin fəaliyyətinə inzibati nəzarəti həyata keçirən orqanın 2024-cü ildə fəaliyyəti haqqında məruzənin müzakirəsi zamanı deyib.

O, "toplanan vəsaitin nə qədəri bələdiyyə işçilərinin əmək haqqına, nə qədəri digər işlərə sərf olunub?” - deyə sual verib:

“Biz deputatlar mütəmadi olaraq ayda iki dəfə seçicilərimizlə görüşürük. Sonuncu dəfə seçicilərimlə görüşəndə onlar əvvəllər olduğu kimi, gileylənirdilər ki, misal üçün, Xətai rayonunda - şəhərin kənarında axşamlar öz evlərinə getməyə qorxurlar, küçələr küçə itləri ilə doludur. Məsələn, bələdiyyələr bu istiqamətdə hansı işləri görürlər? O itlərin sığınacaqlarda yerləşdirilməsi ilə bağlı tədbirlər görürlərmi?

Bizə şikayət edirlər ki, binaların giriş qapıları yoxdur. Həyətlər yaxşı işıqlandırılmır, su ilə dolu olur, həyətlərdə çökəkliklər var, abadlığa böyük ehtiyac duyulur, uşaqların oynaması üçün yer yoxdur. Burada qeyd edildi ki, bələdiyyə müəssisələrinin yaradılması tövsiyə olunub. Bu tövsiyə nəticəsində neçə bələdiyyə müəssisəsi yaradılıb? Orada nə qədər insan işlə təmin olunub? Məruzədə bütün bunlar barədə heç bir məlumat yoxdur.

Hesab edirəm ki, bələdiyyələrin fəaliyyətinə inzibati nəzarəti həyata keçirən orqan ümumiləşdirmə aparmalıdır. Yoxsa "neçə sərəncam ləğv elədik, neçə şəxsin torpağını özünə qaytardıq" kimi addımlar yetərli olmamalıdır və təkliflər verilməlidir".