İran ədliyyə sisteminin həbsdə olduğunu dediyi iş adamı Babək Zəncaninin Tehranda bank açdığı barədə məlumat yayılıb.

Axar.az xəbər verir ki, bu barədə İranın “Dünyayi-İqtisad” saytı məlumat yayıb.

“Tehranın Zaqros küçəsində layihə müəllifinin Babək Zəncani olduğu bildirilən “Beyt Bank” açılıb”, - məlumatda bildirilib.

Bundan iki ay əvvəl isə Babək Zəncaninin adına olan Yutub kanalı həmin bankın açılacağı barədə məlumat paylaşmışdı.

Bu, İran ədliyyə sisteminin Babək Zəncaninin sərbəst buraxıldığı barədə xəbərlərin təkzib etməsindən və onun həbsdə olmasını deməsindən sonraya təsadüf edir.

Qeyd edək ki, İran rəsmiləri ilə yaxın münasibətdə olan Zəncani çirkli pulların yuyulmasındakı roluna görə Qərbin sanksiyalar siyahısına salınıb.

Korrupsiya və dövlət əmlakını mənimsəməkdə günahlandırılaraq həbs edilən Babək Zəncani 2013-cü ildə edam cəzasına məhkum edilib.

Bir müddət əvvəl isə İran rəsmiləri onun mənimsədiyi pulları dövlətə qaytaracağı halda işinə yenidən baxılacağı, ölüm hökmünün dəyişdirilə biləcəyini bildiriblər.

Barəsində edam hökmünün ləğv edildiyi təsdiqlənən Babək Zəncaninin həbsdən buraxılması isə rəsmi şəkildə təsdiq olunmayıb.