Bakıda nəqliyyat sıxlığının əsas səbəblərindən biri sürücülərin yol-nəqliyyat hadisəsi və ya nasazlıq zamanı avtomobillərini vaxtında yolun hərəkət hissəsindən kənarlaşdırmamasıdır. Bəzi sürücülər qəza baş verdikdən sonra nəqliyyat vasitəsini yolun ortasında saxlayaraq, hadisə yerinə sığorta şirkətinin və yol polisi əməkdaşlarının gəlməsini, nasazlıq zamanı isə evakuatorun yaxınlaşmasını gözləyirlər. Bu isə mövcud qanunvericiliyin tələblərinə ziddir və xüsusilə sıx hərəkətli ərazilərdə ciddi tıxaclara yol açır. Sürücü anlamalıdır ki, maşını yolun ortasında saxlamaqla polisin və ya evakuatorun hadisə yerinə yaxınlaşması imkanlarını da çətinləşdirir.

Bu sözləri Axar.az-a açıqlamasında Bakı Şəhər Dövlət Yol Polisi İdarəsinin bölmə rəisi, polis kapitanı Toğrul Nəsirli bildirib.

“Əgər yol-nəqliyyat hadisəsi insan ölümü və ya ağır xəsarətlə nəticələnməyibsə, sürücülər avtomobillərini dərhal yolun hərəkət hissəsindən kənarlaşdırmalı, hadisənin izlərini (şəkillərini) qeydə alaraq yol hərəkətini bərpa etməlidirlər. Əks halda bu, inzibati məsuliyyət yaradır”, – o qeyd edib.

Toğrul Nəsirli sürücülərə müraciət edərək, nasaz avtomobillərlə yollara çıxmamağı, avtomobil yolda xarab olduqda isə onu yolun hərəkət hissəsindən kənarlaşdırmağı tövsiyə edib.