Hər il Pasxa bayramı ərəfəsində Yerusəlimdəki İsa məbədində Müqəddəs Odun enməsi mərasimi keçirilir. İnanclara görə, Müqəddəs Od enmədiyi təqdirdə dünyanın sonu gələcək. Amma bu, doğrudanmı belədir?

Axar.az xəbər verir ki, bununla bağlı ezoterik, psixoloq və ictimai xadim Zirəddin Rzayev “Radio 1”ə açıqlamasında deyib.

Onun sözlərinə görə, Pasxa ərəfəsində Müqəddəs Odun enməsində qeyri-adi və ya paranormal heç nə yoxdur:

“Müqəddəs Od – xalq inancı, xristian kultu və ənənəsidir. Bir çoxları iddia edir ki, bu od əlləri və üzü yandırmır, insanlar guya onunla yuyunurlar. Amma bu barədə elmi araşdırmalara rast gəlməmişəm. Ona görə də təəssüf ki, bu, bir mifdir”.

Onun sözlərinə görə, Müqəddəs Od yalnız insanların inancına əsaslanır və burada heç bir sehr yoxdur:

“Bu, insan əli ilə edilən bir şeydir – odu insanlar özləri yandırırlar. Mən hələ heç bir videoda kimsənin əlinin oda tutub, yanmadığını görməmişəm”.

O, odun enmədiyi təqdirdə dünyanın sonunun gələcəyi fikrinin də sübut olunmamış bir iddia olduğunu vurğulayıb:

“Bir neçə dəfə Müqəddəs Od enməyib, amma dünya hələ də mövcuddur. Belə olan halda, bu nə deməkdir? Əgər od enməsə, dünyanın sonu gələcək deyə niyə narahatlıq keçirək?”.

Qeyd edək ki, "Odun enməsi" ifadəsi xristian (xüsusilə pravoslav) inanclarında xüsusi dini hadisəyə aiddir. İnanclara görə, bu zaman qəbrin içində Müqəddəs Od möcüzəvi şəkildə alovlanır. Bu alov insanlara verilir, şamlar və lampalar onunla yandırılır.

İddia edilir ki, odun ilk dəqiqələrində yandırıcı təsiri olmur.