Yol hərəkəti qaydalarını kobud şəkildə pozan motosiklet sürücülərinin aşkarlanaraq məsuliyyətə cəlb edilməsi istiqamətində Bakı Şəhər Dövlət Yol Polisi İdarəsi tərəfindən mütəmadi nəzarət tədbirləri həyata keçirilir.

Bu sözləri Axar.az-a açıqlamasında Bakı Şəhər Dövlət Yol Polisi İdarəsinin bölmə rəisi, polis kapitanı Toğrul Nəsirli paytaxtda motosiklet sürücüləri ilə bağlı görülən tədbirlərdən danışarkən deyib.

Onun sözlərinə görə, bir neçə gün öncə müxtəlif vaxtlarda Bakının mərkəzi küçələrində avtoxuliqanlıq edən və hərəkət iştirakçıları üçün təhlükə yaradan motosiklet sürücüləri saxlanılıb və barələrində qanunamüvafiq tədbirlər görülüb:

“Dəfələrlə edilən xəbərdarlıqlara baxmayaraq, bəzi motosiklet sürücüləri qaydalara məhəl qoymur, yollarda digər nəqliyyat vasitələrinin hərəkətinə, səkilərdə isə piyadalara ciddi maneələr törədirlər. Bu da nəticədə xoşagəlməz hadisələrin baş verməsinə səbəb olur”.

Toğrul Nəsirli bildirib ki, bu cür nəqliyyat vasitələrini idarə edən sürücülər daha məsuliyyətli olmalı, qaydalara ciddi riayət etməlidirlər:

“Unutmaq olmaz ki, ani diqqətsizlik, qaydalara biganə yanaşma ağır nəticələrə səbəb ola bilər. Aşkarlandığı təqdirdə qayda pozan motosiklet sürücüləri inzibati məsuliyyətə cəlb ediləcəklər”.