Azərbaycanda hazırda 3 rayonun icra başçısı vəzifəsi boşdur.

Axar.az Teleqraf-a istinadən xəbər verir ki, bunlar Qax, Bakı şəhərinin Nəsimi və Naxçıvan Muxtar Respublikasının Culfa rayonlarıdır.

Prezident İlham Əliyevin iyunun 21-də imzaladığı sərəncamla Qax Rayon İcra Hakimiyyətinin başçısı Musa Şəkiliyev vəzifəsindən azad edilib. O, həmin posta 2010-cu ildə təyinat almışdı.

Qeyd edək ki, Dövlət Təhlükəsizliyi Xidməti (DTX) iyunun 20-də Qax Rayon İcra Hakimiyyətində əməliyyat keçirib və icra başçısı M.Şəkiliyevi saxlayıb. Səbail Rayon Məhkəməsi M.Şəkiliyev barəsində 4 ay müddətinə həbs qətimkan təbdir seçib. O, qulluq mövqeyindən istifadə etməklə xüsusilə külli miqdarda dövlət əmlakını mənimsəmə cinayətində ittiham olunur.

Hələlik Qaxın icra başçısı vəzifəsinə təyinat olmayıb. Bu vəzifəni müvəqqəti olaraq İcra Hakimiyyəti başçısının birinci müavini Elbrus Tağıyev yerinə yetirir.

Bakının Nəsimi Rayon İcra Hakimiyyətinin başçısı postu da boşdur. Prezident İlham Əliyevin 2024-cü il sentyabrın 23-də imzaladığı sərəncamla icra başçısı Asif Əsgərov işdən çıxarılıb. O, 2015-ci ildə həmin vəzifədə çalışırdı. A.Əsgərov hazırda Milli Məclisin deputatıdır.

Nəsimi Rayon İcra Hakimiyyəti başçısının səlahiyyətlərini müvəqqəti olaraq başçının müavini Zahid Xəlilov icra edir.

Azərbaycanın ən uzun müddətə icra başçısız qalan rayonu Culfadır. Prezident İlham Əliyev 2023-cü il avqustun 31-də Culfa Rayon İcra Hakimiyyətinin başçısı Siyam Hacıyevi vəzifəsindən azad edib. O, 2019-cu il aprel ayının 2-dən bu postda çalışırdı.

Adıçəkilən rayonun icra başçısının səlahiyyətlərinin icrası müvəqqəti olaraq başçının müavini Sara Hüseynovaya tapşırılıb.