Azərbaycan Dövlət Neft Şirkətinin (SOCAR) Karbamid Zavodunda tətbiq olunan “Ağıllı eynək” uzaqdan texniki nəzarət və operativ əlaqə imkanlarını xeyli asanlaşdırır.

Axar.az xəbər verir ki, bu barədə jurnalistlərə zavoda təşkil olunan mediatur zamanı müəssisənin istehsalat şöbəsinin rəisi Şöhrət Mirzəyev deyib.

Onun sözlərinə görə, “Ağıllı eynək” müasir istehsalat sahələrində istifadə olunan ən praktik və funksional alətlərdən biridir:

“Aparatın əsas üstünlüyü məsafədən mütəxəssislərlə canlı əlaqə qurmaq və texniki proseslərə cəld müdaxilə imkanı yaratmaqdır. Məsələn, qapalı bir sahəyə yalnız bir əməkdaş daxil olduqda belə digər mütəxəssislər sanki hadisə yerindəymiş kimi prosesi izləyə, təlimat verə və lazımi dəstəyi göstərə bilirlər”.

Mirzəyev bildirib ki, bu texnologiya uzaqda olan əməkdaşların operativ şəkildə qərar verməsinə imkan yaradır:

“Əgər hər hansı bir mütəxəssis müəssisədən kənardadırsa – məsələn, evdə və ya başqa məkanda – və onun yardımına ehtiyac yaranırsa, o zaman “Ağıllı eynək” vasitəsilə real vaxtda zavoddakı komanda ilə əlaqə saxlayaraq vəziyyəti qiymətləndirə və yönləndirici tapşırıqlar verə bilər. Alətin əsas funksiyası da məhz budur”.

Mediatur zamanı jurnalistlərə müəssisənin mərkəzi idarəetmə otağı da təqdim olunub. Burada proseslərin tamamilə avtomatlaşdırılmış və paylaşdırılmış sistemlər vasitəsilə fasiləsiz izlənildiyi və idarə olunduğu bildirilib.