Bu gün Azərbaycanın Milli Qəhrəmanı, telereportyor Çingiz Mustafayevin doğum günüdür. Çingiz Mustafayev 1960-cı il avqustun 29-da hərbçi ailəsində anadan olub. 1983-cü ildə Azərbaycan Tibb İnstitutunu bitirib.

Ermənistanın Azərbaycana qarşı Qarabağ təcavüzü başlayandan sonra Çingiz jurnalistikaya üz tutub. O, 1991-ci ildən Azərbaycan Dövlət televiziyasında reportyor kimi çalışmağa başlayıb.

"Çingiz, gözünüz uşaqlarda olsun". Bu Qarabağ müharibəsi zamanı Çingizə həsr edilən məqalələrdən birinin başlığıdır. Xalq onu jurnalistdən əlavə ordumuzun qoruyucusu kimi görüb.

Çingizin reportajları informasiya blokadasında olan Azərbaycan haqqında həqiqətlərin dünyaya çatmasına yol açıb. Dövlət televiziyasında mövcud olan senzura Çingizi başqa işlər görməyə vadar edir. Ona görə də Çingiz "215 kl" studiyası kimi muxtar tele-qurum yaradır.

Dünya Çingiz Mustafayevi daha çox Xocalıda çəkdiyi kadrlarla tanıdı. Onun Xocalı kadrları Ermənistanın vəhşi imicini bütün dünyaya göstərdi.

Çingiz Mustafayev 1992-ci ilin iyunun 15-də Ağdamın Naxçıvanik kəndində çəkiliş zamanı aldığı mərmi qəlpəsindən həlak olub. O, sonadək kameranı söndürməyib və ölüm anı qeydə alınıb.

Çingiz Mustafayev 1993-ci ildən Azərbaycanın Milli Qəhrəmanıdır.

Axar TV-nin süjetini və Çingiz Mustafayevə aid bir videonu təqdim edirik.