Mən şou-biznesdə baş verən bir çox proseslərdən uzağam.

Bu sözləri xalq artisti Aygün Kazımovanın prodüseri Roland Bayramov müğənni Türkan Heydərova ilə çalışmağa başlaması haqda Axar.az-a danışarkən deyib. O, Aygün Kazımova ilə də işbirliyini davam etdirdiyini bildirib:

"Qalmaqaldan, səs-küydən kənar gəzən insanam. Yalnız yeni layihələr olduğu zaman jurnalistlərlə bölüşməyi üstün tuturam. Boş-boş danışmaq əvəzinə, yeni iş təqdim etmək lazımdır. Xalq artisti Aygün Kazımova ilə də işbirliyimiz davam edir. Eyni zamanda Türkanla da çalışıram və birgə yeni layihələrə imza atacağıq. Öncədən söyləməyim, sürpriz olsun".

Müğənni Türkan Heydərova da R.Bayramovla işbirliyindən danışıb:

"Bu günə qədər heç vaxt reklam dalınca qaçmamışam. Bu sənətə təsadüfi gələn müğənnilərdən deyiləm. Sadəcə, "Yeni ulduz" yarışmasından sonra təhsilimlə əlaqədar olaraq, yaradıcılığıma fasilə verdim, indi isə yenidən sənətimə start verirəm. Məhz buna görə də prodüser Roland Bayramovla işləməyə qərar verdim. Azərbaycan Dövlət Mədəniyyət və İncəsənət Universitetində "Musiqili teatr aktrisası" fakültəsində xalq artisti Afaq Bəşirqızının tələbəsi olmuşam. Bundan başqa, təhsili 2012-2013-cü illərdə Moskvada davam etdirmişəm. Bu gün isə sözləri, aranjimanı Nadir Nəğdpula, musiqisi Kazım Cana məxsus "Canım" adlı yeni mahnımı dinləyicilərin ixtiyarına verirəm. Düşünürəm ki, bu mahnı şou-biznesə qayıdışımda mənə uğur gətirəcək və insanlar tərəfindən seviləcək".