Öldükdən sonra basdırılmaq yerinə yandırılmaq istəyən türkiyəli ateistlər imza kampaniyası başladıb.

Axar.az xəbər verir ki, ateistlər 3 min imza toplayaraq İstanbul Böyükşəhər bələdiyyəsindən öləndən sonra yandırılmaq üçün soba tələb ediblər.

Ateizm dərnəyi başladılan kampaniya ilə bağlı belə bir açıqlama yayıb:

"Bir soba qurulsun və yandırılaraq dəfn edilmək istəyənlərin arzuları həyata keçirilsin. Hamı torpağa basdırılmaq məcburiyyətində deyil. Dünyada bir çox ölkədə insanları öldükdən sonra vəsiyyətlərinə uyğun yandırırlar. Türkiyədə də nəşinin torpağa basdırılması yerinə yandırılmasını istəyən çox adam var, amma soba olmadığı üçün bu istək yerinə yetirilmir".

Qeyd edək ki, öldükdən sonra yandırılan şəxslərin faizi Yaponiyada 99.85%, Hindistanda 85%, İsveçrə və Danimarkada 76%, İngiltərədə 72%, İsveçdə 70%, Hollandiyada 50%, ABŞ-da 40%-dir. Türkiyədə isə hamının cənazəsi öz arzularına uyğun deyil, bələdiyyənin münasib bildiyi kimi basdırılaraq dəfn edilir.