Ötən ilin aprelində Vyanadan qaçıb İŞİD-ə qoşulan Bosniya əsilli Səmra Kesinoviçlə (17 yaş) Sabina Səlimoviç (16 yaş) ölüb.

Axar.az xəbər verir ki, bu barədə "Lokal Avstriya" saytı vyanalı qızlarla birlikdə İŞİD-in paytaxtı Rakkada yaşayan və terrorçulardan qaçmağı bacaran tunisli qadına istinadən məlumat yayıb.

Məlumata görə, Sabina ötən ilin dekabrında Suriyada gedən döyüşlər zamanı öldürülüb. Səmra Kesinoviç isə Rakkadan qaçarkən terrorçular tərəfindən tutulub və çəkiclə öldürülüb.

Qeyd edək ki, qızlar ötən ilin aprelində Vyanadan Türkiyəyə gedərək Suriyaya keçiblər. İŞİD Rakkada Kalaşnikovla şəkil çəkdirən qızlardan reklam siması kimi istifadə edərək təşkilata yeni döyüşçülər yığırdı.