Ana səhifə Gündəm |
Rusiya hərbi təyyarəsinin Türkiyə səmasında vurulmasından sonra Ankaraya artan hərbi təzyiqə görə ABŞ hökuməti Türkiyəyə daha bir neçə F-15 göndərməyə qərar verib.
Axar.az xəbər verir ki, Pentaqonun mətbuat xidmətinin rəhbəri Peter Kuk bununla bağlı Türkiyə hökumətinin hələ bir müddət əvvəl ABŞ-a müraciət etdiyini bildirib. Kukun sözlərinə görə, müraciət məhz rus hərbi təyyarələri ilə bağlı edilib.
Rusiya təyyarələrinin Türkiyə hava sərhədini bir neçə dəfə pozmasından sonra Ankaranın müraciəti əsasında ABŞ hələ 15 gün əvvəl 6 ədəd F15C "İql" qırıcısını Türkiyənin İncirlik bazasına göndərmişdi.
Rusiya hərbi təyyarəsinin Türkiyənin hava sahəsini pozarkən
vurulması isə ABŞ-ı daha bir addım atmağa vadar edib. Kukun
məlumatına görə, yeni göndəriləcək F-15 "Strayk İql"
qırıcı-bombardmançıları birbaşa Rusiya Hərbi Hava Qüvvələrinin
Türkiyə təhdidinin qarşısını almağa yönəlib:
"Vaşinqtonun bu addımı NATO müttəfiqlərinin təhlükəsizliyini təmin
etməyə, eləcə də İraq və Suriyada İŞİD-in mövqelərini zəiflətməyə
və ona qalib gəlməyə yönəlib. Məhz buna görə Türkiyəyə
bombardmançı-qırıcılar da göndəriləcək. Xüsusilə tez bir zamanda
terrorçular və hava sərhədini pozan rus təyyarələri ilə mübarizə
aparan Türkiyə Hərbi Hava Qüvvələrinə dəstək üçün İncirliyə F-15
"Strayk İql" qırıcı-bombardmançıları çatdırılacaq", - Kuk
bildirib.
Qeyd edilir ki, məlum qırıcı qalmaqalından sonra Rusiyanın Qara dənizdə demək olar ki, heç bir müttəfiqi qalmayıb. 5 Qara dəniz dövlətindən 3-ü – Türkiyə, Bolqarıstan və Rumıniya NATO üzvləridir, Ukrayna və Gürcüstan isə Alyansa qatılmağın bir addımlığındadır və qərbmeyilli mövqe tuturlar. Bundan başqa, Ukrayna, Bolqarıstan və Türkiyə hava sahələri də Rusiya üçün qadağan olunub.
Tarix
2015.11.28 / 12:23
|
Müəllif
Anar Əhmədov
|