Prezident təqaüdçüləri Gənclər Birliyinin rəhbəri Təbriz Raufoğlu Mədəni Diplomatiya İnstitutunun dəvəti ilə Nyu Yorkda keçirilən Beynəlxalq Mədəni Diplomatiya Simpoziumunda iştirak edib.

Bu barədə Axar.az-a T.Raufoğlu özü məlumat verib. O qeyd edib ki, tədbir BMT, Kolumbiya Universiteti, Almaniyanın Höte İnstitutu daxil olmaqla, kifayət qədər reputasiyalı beynəlxalq təşkilatlar tərəfindən dəstəklənib.

Birlik sədri artıq konfransın sona çatdığını bildirib:

"İlk gün ərzində ilkin məruzələr dinlənildi və bir sıra tanınmış şəxslər tərəfindən çıxışlar oldu. Dünyada gedən siyasi proseslərin fonunda müxtəlif toplumlar arasında mədəni əlaqalərin yaradılması və inkişaf etdirilməsi istiqamətində müzakirələrin aparıldığı konfrans 30 may tarixində öz işinə yekun vurdu".

Təbriz Raufoğlu əlavə edib ki, mayın 28-də "Konflikt zonalarında mədəni diplomatiyanın inkişaf etdirilməsində gəncləin rolu" adlı məruzəylə çıxış edərək konfrans iştirakçılarına mövcud münaqişələrin yaranma səbəbləri, aradan qaldırılması istiqamətində aparılan danışıqlar və onların nəticələri haqqında məlumat verib.