Polşada start götürən Anakonda-16 hərbi təlimləri NATO rəhbərliyini narahat edir.

Axar.az xəbər verir ki, bu iddia ilə Der Şpigel nəşri çıxış edib.

Nəşrin iddialarına görə, Alyans 24 ölkədən 31 min hərbçinin iştirak etdiyi bu təlimlərin "açıq-aşkar Rusiyaya yönəldiyini" və ehtiyac olmadan real müharibə ssenarisi yaratdığını hesab edir:

"Varşavanın təzyiqi ilə Anakonda-16 təlimlərində demək olar ki, bütün NATO ölkələri, o cümlədən, ABŞ iştirak edir. Brüsseldə rəsmi Moskva ilə dialoq haqqında müzakirələr gedərkən, Polşa müharibə oyunu oynayır. NATO Rusiyanı "əsəbiləşdirməmək üçün" Gürcüstanı və Ukraynanı öz tərkibinə qatmaq istəmədiyi bir vaxtda, Polşa onları hərbi təlimlərə dəvət edir".

Nəşrin sözlərinə görə, hazırda NATO rəhbərliyi Polşanı "sakitləşdirməyə" çalışır. Polşa isə anti-Rusiya siyasətindən geri çəkilmək niyyətində deyil.

Xatırladaq ki, daha öncə Kreml sözçüsü Dmitri Peskov Polşada keçirilən təlimlərin regionda sabitliyə və təhlükəsizliyə təhdid olduğunu açıqlamışdı.