Türkiyənin “Milliyyət” qəzeti Azərbaycanın Ankaradakı səfiri Faiq Bağırovun “Azərbaycan-Türkiyə münasibətlərinin 25 illiyi” sərlövhəli məqaləsini yayıb.

Axar.az xəbər verir ki, Azərbaycan və Türkiyə arasında diplomatik əlaqələrin qurulmasının 25 illiyinə həsr olunan məqalədə bütün sahələr üzrə yüksələn xətlə inkişaf edən münasibətlərin ayrı-ayrı istiqamətləri təhlil olunub.

Azərbaycanın dövlət müstəqilliyinin qardaş Türkiyə tərəfindən tanınmasından və diplomatik münasibətlərin bərpa olunmasından ötən dövr ərzində iki ölkə arasında baş verən proseslərə nəzər salan müəllif yazır ki, Bakı-Tbilisi-Ceyhan neft və Bakı-Tbilisi-Ərzurum qaz kəmərlərinin fəaliyyətindən əldə olunan bəhrələr hesabına Azərbaycan və Türkiyə üçün xüsusi əhəmiyyət daşıyan Bakı-Tbilisi-Qars dəmir yolu, TANAP və TAP layihələrinin reallaşması üçün tarixi şərait yaradılıb.

Ötən ilin əvvəlində Bakıda keçirilməsi nəzərdə tutulan Azərbaycan-Türkiyə Yüksək Səviyyəli Strateji Əməkdaşlıq Şurasının növbəti iclasının təxirə salınmasının səbəbləri, bu məsələ ilə əlaqədar Prezident İlham Əliyevin qardaş Türkiyəyə jest edərək Ankaraya səfər etmək barədə tarixi qərar qəbul etməsi və digər mühüm məqamlara nəzər salan səfir iki ölkə arasında qarşılıqlı sərmayə qoyuluşunun səviyyəsi, bu sahədə perspektivdə olan yeni layihələr və s. barədə türkdilli oxuculara məlumat verir.