Türkiyə, İran və Rusiya prezidentlərinin apreldə gözlənilən üçtərəfli görüşü hələ ki, ehtimaldır.

Bu sözləri Axar.az-a açıqlamasında analitik Elçin Mirzəbəyli deyib. Analitik bunun səbəbini aprelə qədər regionda və dünyada tərəflərin münasibətlərinə təsir göstərə biləcək hadisələrin baş verə biləcəyi ilə izah edib:

“Türkiyə Suriya ərazisində “Zeytun budağı” əməliyyatı həyata keçirir. Bu, türk əsgərinin son illər ərazində həyata keçirdiyi ən geniş hərbi əməliyyatdır. İran və Rusiya “Zeytun budağı” əməliyyatı və Türkiyənin Suriyadakı hərbi mövcuduğu ilə bağlı kəskin bəyanatlar verməsələr də, proseslərin Moskva və Tehran tərəfindən narahatlıqla qarşılandığı açıq-aşkar hiss olunur. Əgər Türkiyə “Zeytun budağı” əməliyyatını uğurla başa çatdırarsa, şübhəsiz ki, bu, Ankaranın həm regional, həm də beynəlxalq müstəvidə mövqelərini möhkəmləndirəcək”.

E.Mirzəbəyli bildirib ki, əməliyyatlar aprel ayına qədər başa çatarsa, o zaman üçtərəfli görüşün baş tutacağını və nəticə etibarilə Ankaranın maraqlarının təmin ediləcəyini gözləmək olar:

“Son dövrlərdə Suriya böhranı çərçivəsində diqqəti cəlb edən önəmli məqamlardan biri də İsraillə İran arasındakı ritorikanın güclənməsidir. İranın Suriyadakı hərbi bazaları haqqında yayılan məlumatlar və İsrailin bu bazaları özünə təhlükə etdiyini bildirməsi Təl-Əvivin də Suriyaya açıq müdaxilə edə biləcəyi ehtimalını yarada bilər. Belə olduğu təqdirdə isə Suriya böhranın mahiyyətində ciddi dəyişikliklərin baş verəcəyi istisna deyil”.

Qeyd edək ki, Kremlin mətbuat xidmətinin rəhbəri Dmitri Peskov apreldə Türkiyədə Prezident Rəcəb Tayyib Ərdoğan, İran Prezidenti Həsən Ruhani və Rusiya Prezidenti Vladimir Putinin görüşü üçün hazırlıqların aparıldığını bildirib.