Ermənistanın daxilindəki qeyri-stabil vəziyyət birbaşa erməni siyasətçilərin xarici meydanlardakı mövqeyinə də sirayət edir.

Bunu Axar.az-a KTMT-nin son toplantısının nəticələrinin Ermənistanda keçiriləcək seçkilərə təsiri haqda danışan politoloq Tofiq Abbasov deyib. O bildirib ki, Ermənistanın Rusiyadan sonra Qazaxıstan və Belarusa da düşmən mövqe bəsləməsi İrəvanı uçuruma apara bilər:

“Ermənistan siyasi elitasının hazırkı mövqeyi və tutduğu məram çox təhlükəlidir. Ermənistanın daxilindəki qeyri-stabil vəziyyət birbaşa erməni siyasətçilərin xarici meydanlardakı mövqeyinə də sirayət edir. Ermənilərin hər vəchlə öz istəklərini başqalarına sırıması KTMT-yə üzv dövlətlər tərəfindən anlaşılmazlıqla qarşılanır. Ümumiyyətlə, ermənilər rasionallıqdan çox uzaqdırlar və hər zaman bütün sahələrdə əlavə gərginlik yaratmağa çalışırlar. Bu gün Azərbaycanın ən böyük problemi də Ermənistan kimi qeyri-adekvat bir subyektlə qarşı-qarşıya olmasıdır. Daim naqolay yanaşmalar sərgiləyən Ermənistanla normal siyasi dialoq qurmaq mümkün deyil. Məhz bu cür yarıtmaz siyasət ucbatından Ermənistanın onsuz da ağır olan vəziyyəti getdikcə daha da çətinləşir”.

Politoloq Paşinyanın seçki öncəsi KTMT daxilindəki vəziyyətdən öz məqsədləri naminə yararlanmağa çalışdığını deyib:

“Paşinyan hazırda özünü güclü siyasətçi kimi göstərmək üçün dəridən-qabıqdan çıxır. Belə ki, Nikol KTMT-lə bağlı qəsdən münaqişəli vəziyyət yaradaraq, guya ölkəsinin tələbələrini ortaya qoyduğunu, İrəvanın maraqları uğrunda ən amansız müharibəni aparmağa qadir olduğunu və hətta buna görə Rusiya, Belarus, Qazaxıstanla münasibətləri korlanmasını belə gözə aldığını nümayiş etdirməyə çalışır. Beləliklə, Paşinyan Astana uğursuzluğunu ört-basdır edəcəyini düşünür. Nə qədər parodoksal görünsə və Ermənistana bir sıra problemlər yaratsa da, belə bir oyun Paşinyanın seçkilərdəki nəticələrinə müsbət təsir göstərə bilər. Hesab edirəm ki, bütün bu köpüklər seçkilərdən sonra tamamilə yoxa çıxacaq. Əgər Paşinyan inamlı qələbə qazanarsa, onun davranışlarında böyük transformasiyaları gözləmək olar”.