Ermənistanda seçkilərə olan münasibətin yekun nəticəsi göstərdi ki, siyasi mübarizədə hələ cəmiyyətin bütün çəkisi iştirak etmir.

Bu sözləri Axar.az-a açıqlamasında analitik Elçin Mirzəbəyli deyib. O bildirib ki, Ermənistanda yayılan rəsmi məlumatlar seçkilərin kifayət qədər ciddi qanun pozuntuları ilə keçirildiyini təsdiqləyir:

“Amma nəticə ortalıqdadır. Paşinyanın bloku parlamentdə 3-də 2 səs çoxluğunu əldə edib. Bu da onun qərar qəbul etməsi üçün hər hansı bir maneə yaratmayacaq”.

Analitik qeyd edib ki, parlamentə düşən bir blok və iki partiya arasında Qarabağ klanını təmsil edən hər hansı siyasi qüvvə yoxdur:

“Qarabağ klanı son dövr ərzində ilk dəfədir ki, bütövlükdə Ermənistan parlamentindən, idarəçiliyindən kənarda saxlanılır. Bu da faktiki olaraq gözlənilən idi. İndiki şəraitdə ola bilsin ki, Qarabağ klanı ilə Ermənistanın indiki rəhbərliyi arasındakı ziddiyyətlər daha da dərinləşsin və kəskin müstəviyə keçsin. Çünki onlar artıq siyasi müstəvidə mübarizə aparmaq imkanlarını əldən veriblər. Ola bilər ki, bu, artıq küçə və meydanlar müstəvisində həyata keçirilsin”.

Analitik vurğulayıb ki, Paşinyan bu günə qədər Ermənistanın daxili problemlərini, eyni zamanda, xarici siyasətdə mövcud olan ziddiyyətlərlə bağlı məsuliyyəti keçmiş hakimiyyətin üzərinə qoyurdu:

“İndiki şəraitdə onun bu şansı yoxdur. Yəni məsuliyyəti kiminsə üzərinə atmaq mümkün olmayacaq. Bu baxımdan da həm daxili siyasətdəki məsələlərlə, həm də Ermənistan-Azərbaycan Dağlıq Qarabağ münaqişəsinin həlli ilə bağlı ciddi qərarlar qəbul etmək üçün məsuliyyəti öz üzərinə götürməlidir”.

Qeyd edək ki, dünən Ermənistanda növbədənkənar parlament seçkiləri keçirilib. Seçkinin nəticəsinə görə, Mənim Addımım Bloku, Çiçəklənən Ermənistan və İşıqlı Ermənistan partiyaları parlamentdə təmsil olunmaq imkanı qazanıb.