Təbriz şəhərində Azərbaycanın tarixi qəhrəmanlarından olan Zeynəb Paşanın büstü Bələdiyyə İdarəsi tərəfindən götürülüb.

Kult.az xəbər verir ki, Zakir-Çaykənar kəsişməsində quraşdırılan büst gecə saatlarında gizli şəkildə götürülüb. Bu işin təşkilatçısının Təbriz bələdiyyə başqanının mədəniyyət və incəsənət işləri üzrə müşaviri, məşhur paniranist İsfəndyar Qarabaği olduğu ehtimal edilir.

Zeynəb Paşanın büstü ötən illərdə azərbaycanlı heykəltəraş Əhəd Hüseyni tərəfindən hazırlanıb. Həmin büstün biri də Təbrizin Məşrutə Evində qoyulub.

Xatırladaq ki, Zeynəb Paşa qadın əqidədaşları ilə birlikdə Qacarlar dövrünün sonlarında zülmə qarşı mübarizədə böyük rol oynayıb, demokratiya və məşrutə inqilabı uğrunda kişilərlə çiyin-çiyinə mübarizə aparıb. Təbriz bazarını gəzərək hər kəsi mübarizəyə dəvət edən Zeynəb Paşa Təbrizdə aclıq zamanı taxıl anbarlarını açdırıb taxılı xalqa paylayan, eləcə də Tənbəki üsyanına rəhbərlik edən mübariz Azərbaycan qadınıdır.