"Qarabağ” və "Şerif” yaxşı komandalardır. İnanıram ki, maraqlı oyun olacaq.

Axar.az xəbər verir ki, bu sözləri "Neftçi"nin baş məşqçisi Roberto Bordin "Qəbələ" (2:1) ilə oyundan sonra keçirilən mətbuat konfransında deyib. Oyunla bağlı proqnoz verməkdən boyun qaçıran Bordin "Şerif"in uğur qazanmasını istədiyini bildirib:

"Hazırda mən "Neftçi”yə azarkeşlik edirəm. Düzdür, "Şerif”də işləmişəm və uğurlar qazanmışam. Həmişə o komandanın uğur əldə etməsini istəyəcəyəm".

Qeyd edək ki, "Qarabağ"-"Şerif" matçı avqustun 23-də Tiraspoldakı “Şerif” İdman Kompleksinin stadionunda baş tutacaq. Cavab qarşılaşması isə ayın 30-da Tofiq Bəhramov adına Respublika stadionunda keçiriləcək. Hər iki oyun saat 21:00-da start götürəcək.