Gürcüstan BMT Baş Assambleyasının müzakirəsinə qaçqınların öz evlərinə qayıtması haqları barədə qətnaməni çıxarsa, biz Cenevrə danışıqlarını dayandıracağıq.

Axar.az xəbər verir ki, bunu BMT Təhlükəsizlik Şurasındakı çıxışı zamanı Rusiyanın BMT-dəki daimi nümayəndəsi vəzifəsinin səlahiyyətlərinin icraçısı Pyotr İliçev söyləyib. O, çıxışı zamanı Abxaziya və Cənubi Osetiyadakı situasiyanın konflikt olmadığını bildirib. Rus nümayəndə Təhlükəsizlik Şurasının bu məsələyə diqqət ayırmasının əbəs olduğunu söyləyib:

“Abxaziya və Cənubi Osetiyanın “dövlət suverenliyi” müzakirə predmeti ola bilməz. Gürcüstanla Abxaziya və Cənubi Osetiya arasındakı fikir ayrılıqlarının həlli üçün Cenevrə diskussiyaları mövcuddur. Əgər Gürcüstan və onun hamiləri Nyu Yorkda təhlükəsizlik məsələlərini Abxaziya və Cənubi Osetiya olmasın müzakirəyə çıxarsalar, Cenevrə danışıqları dayandırılacaq”.

Qeyd edək ki, bir müddət öncə Tiflisin xahişi ilə Ukrayna BMT Təhlükəsizlik Şurasının müzakirəsinə Abxaziyadakı seçkiləri və Cənubi Osetiyadakı referendumu çıxarıb.