Son günlər ölkə ərazisində havaların şaxtalı-qarlı keçməsi ilə əlaqədar yollar buz və qarla örtüldü. Paytaxtın bəzi yerlərində asfalt örtüyünün təmizlənməsi zamanı isə problemlər yaşandı.

Axar.az xəbər verir ki, sosial şəbəkə istifadəçiləri Bakının bəzi ərazilərində, o cümlədən Yasamal rayonu, Dadaş Bünyadzadə küçəsində yolların buz tutmasının qarşısını almaq üçün qum deyil, çınqıl töküldüyünü, nəticədə asfalt örtüyünün yararsız hala düşdüyünü yazıblar. İstifadəçilər yeni təmir edilən və yüksək səviyyədə olan yolları çınqılın dağıtmasından və bununla da dövlət büdcəsinə milyonlarla manat ziyan vurulduğundan şikayətləniblər.

Məsələ ilə bağlı Axar.az-a danışan Yasamal Rayon İcra Hakimiyyətinin əməkdaşı hadisədən xəbərdar olmadıqlarını bildirib:

“Bizim xəbərimiz yoxdur. Bu məsələ bizdən asılı deyil, yollara qum və duz səpilməsini Mənzil İstismar İdarəsi həyata keçirir”.

Mənzil İstismar İdarəsindən isə bildirildi ki, məsələdən tamamilə xəbərsizdirlər:

“Dadaş Bünyadzadə küçəsi çox geniş küçədir. Yeni Yasamaldan 22 saylı MİS-ə qədər ərazini əhatə edir. İndi sizdən eşidirik ki, belə bir hadisə olub, məsələdən xəbərdar deyilik. O küçələrə çınqılı kimin tökdüyünü də bilmirik”.