Azərbaycanın Azərspeys-2 (Azerspace-2) peyki Fransa Qvianasında yerləşən Kuru kosmodromundan orbitə buraxılıb.

Axar.az Report-a istinadən xəbər verir ki, Azərspeys-2 peyki orbitə “Eriyanspeys” ("Arianespace”) şirkətinə məxsus Eriyan-5 ağır daşıyıcı raketi ilə göndərilib.

Buraxılış çərşənbə günü Bakı vaxtı ilə gecə saat 02:29-da start götürüb.

Peyk 45° şərq uzunluğu orbital mövqeyində yerləşəcək. Azərspeys-2 peykinin orbitdə istismar müddəti minimum 15 il təşkil edəcək.

Bu, Eriyan-5 raket daşıyıcısı üçün yubiley - sayca 100-cü buraxılış olub. Onun göyərtəsində iki əcnəbi telekommunikasiya peyki – Azərspeys-2 və Horizons-3e var. Birinci aparat məlum olduğu kimi Azərbaycana, ikinci isə Yaponiyaya məxsusdur.

Azərspeys-2 Azərbaycanın orbitə çıxarılan üçüncü peykidir.

Peyk Speys Sistem/Loral (SSL) şirkəti tərəfindən yüksək etibarlı SSL-1300 peyk platforması əsasında istehsal olunub.

Azərspeys-2 peyki Avropa, Mərkəzi və Cənub-Qərbi Asiya, Yaxın Şərq və Tropik Afrika ölkələrini əhatə edəcək. Yeni peyk Azərkosmosun xidmət spektrinin və fəaliyyət coğrafiyasının genişləndirilməsi ilə yanaşı birinci telekommunikasiya peyki – Azərspeys-1 peykinin orbitdəki ehtiyatı olacaq. Peyk regionda dövlət və özəl qurumlara şəbəkə xidmətləri sahəsində artmaqda olan tələbləri qarşılamaq üçün yüksək texniki imkanlar, əlverişli əhatə zonası və keyfiyyətli xidmət təklif edəcək.