"Son bir ay ərzində Dini Qurumlarla İş üzrə Dövlət Komitəsinin sədri Mübariz Qurbanılının da iştirakı ilə rayonumuzda üç dəfə geniş tərkibli müşavirə keçirilib. Ciddi müzakirələr aparılıb. Ümumi rayon üzrə 500 nəfər vəhhabi təriqətinə qoşulub.

Lakin onlardan 3-4 nəfəri daha radikaldır. Sizə deyim ki, bu cür halların rayonumuz üçün, ümumiyyətlə, ölkəmiz üçün heç bir təhlükəsi ola bilməz. Çünki hüquq-mühafizə və müvafiq dövlət orqanları bu məsələni ciddi nəzarətdə saxlayır, bütün lazımi tədbirlər görülür".

Axar.az xəbər verir ki, bu sözləri Xaçmaz rayonunun icra başçısı Şəmsəddin Xanbabayev Virtualaz.org-a müsahibəsində bölgədəki İŞİD tərəfdarları haqda danışarkən qeyd edib.

Ş.Xanbabayev deyib ki, rayondan bu cür təriqətlərə qoşularaq ölkəni tərk edənlər çox azdır:

"Son zamanlar bu cür hadisələrdən biri Xudatda baş vermişdi. Səhv eləmirəmsə, bir nəfər radikal təşkilatlardan birinə qoşularaq getmişdi".

Qeyd edək ki, ölkənin şimal zonasında vəhhabilərin məscidləri, toplaşma mərkəzləri var. Azərbaycanda Suriya və İraqa döyüşməyə gedənlərin də bu bölgədən daha çox olduğu deyilir.