"Azərbaycan rəhbərliyi bu cür böyük tədbirlərin təşkilatçılığı istiqamətində çox güclüdür, başarılıdır".

Bu sözləri Türkiyənin məşhur yazarı, əsərləri Azərbaycan teatrlarında da mütəmadi olaraq səhnələşdirilən Tuncər Cücənoğlu Axar.az-a Azərbaycanda keçiriləcək I Avropa Oyunları haqqında danışarkən deyib. Dramaturq bildirib ki, Azərbaycan bu dəfə də bu cür böyük bir tədbirin öhdəsindən uğurla gələcək:

"12-28 iyun tarixləri arasında keçiriləcək ilk Avropa Oyunlarının Azərbaycanda – Bakıda baş tutması məni həqiqətən çox həyəcanlandırdı. Dost və qardaş ölkə təşkil olunan bu yarışlarda bizim ölkəmiz Türkiyədən də 23 fərqli idman növü üzrə idmançının iştirak etməsi xəbəri məni daha da sevindirdi. Azərbaycan rəhbərliyi bu cür böyük tədbirlərin təşkilatçılığı istiqamətində çox güclüdür, başarılıdır. Çünki illər öncə, yenə Bakıda gerçəkləşən və mənim də iştirak edib şahidi olduğum Teatr Olimpiadalarında da Amerika, Rusiya, Çin, Fransa, Almaniya, İngiltərə, Gürcüstan başda olmaqla çox sayda ölkə iştirak etmişdi. Mükəmməl təşkilatçılıq sayəsində iştirakçılar olaraq böyük bir teatr bayramı havası yaşamışdıq. Ondan sonrakı günlərdə də bu tədbirin möhtəşəmliyi iştirakçıların dilindən düşməmişdi. Teatr istiqamətində gələcəyə yönəlmiş istək və gözləntilər inamla müzakirə olunurdu.

Bu dəfə də bu cür böyük bir tədbirin öhdəsində başarı ilə gələrək, ölkə olaraq böyümə yolunda ciddi addımlar atan qardaş Azərbaycana indidən uğur diləyirəm.

Əsərləri mütəmadi olaraq Azərbaycan teatrlarında səhnələşdirilən bir türkiyəli yazar olaraq yaradıcı və çalışqan xalqınızla qürur duyuram".